زجاجة مياه ب ٢٥٠ جنيه…!

صار الساحل الشمالي … بوءرة ازعاج وتكدير لمشاعر الملايين من شعب يجاهد لكي يعيش…فلا يكاد يمر يوم حتى يأتيك خبر من هناك او تسمع عن حفل او ظاهرة او تقليعة تغيظك اكثر من سابقتها.. وبعد اخبار فيلات الساحل التي تراوحت اسعارها بين ٢٠ و ١٢٠ مليون واشترى الاغنياء في ٦ ساعات ٣٠٠ فيلا بتكلفة ٣٤ مليار يعني نصف ما جمعته الدولة من تحويشة الملايين لحفر قناة السويس الجديدة …! وفي استفزاز واستعراض واستهانة بمشاعر الناس خرجت احدى الممثلات لتقول: يعني الواحد يقعد طالعان عينيه طول السنة بيشتغل ويحط مرتب سنه في حتة فيلا في الآخر…والسؤال الفوري: وهو حضرتك شغاله ايه لا مؤاخذة عشان تلمي ١٠٠ مليون في سنه..؟ ولا أدري لماذا يصر الاغنياء وصحف الاثارة على استفزاز الفقراء باخبار الترف والمليارات المنفقة على نزواتهم في تجاهل تام لمشاعر ١٠٠ مليون يكابدون الاسعار الملتهبة واعباء الفقر والغلاء وبالكاد يدبرون مطالبهم الاساسية … بل أتساءل هل ما نسمع من تلك الاخبار مدبر ومفتعل ونواياه خبيثة….!!؟ تستمتعون بتعذيب شعب عايش معاكم وفيهم من يعجز عن تدبير ايجار شقه ٥٠٠ جنيه وعليه ديوان وبلاوى .. ولو ضيع مرتب عمره ميجيبش عمود ف الفيلا الاسطورية … ومنهم من يشتغل سنه كامله علشان يجيب تليفون سامسونج… وبيحوش من ايام مبارك عشان يطلع يومين فى جمصه…! ولم يكتف السفهاء بل اتحفونا بالمزيد من التكدير فخرجت ممثلة تشكو بان زجاجة المياه بـ250 جنيه».في الساحل الشمالي…! والعجيب ان هناك من يشتريها…،! كفاية استفزاز واتركوا الناس تحمد ربنا وراضية تعيش مستورة بدون فتنة…! ‎الحمدلله …إنها دنيا وهتنقضي وهتفنى ونستريح من اخبار الحمقى ووجوههم … والأهم ربنا يخرجنا منها على خير غير مفتونين ولا ظالمين ويرزقنا الصبر والقدرة على التحمل وهو الرحيم بعباده... س غ